Rabiye xanimni qanchilik chüshinisiz?

Rabiye xanimni qanchilik chüshinisiz?

Bu tor bétidiki bezi pitnilerni Rabiye xanimning qozghighanliqini bilgendin kéyin, Bu yazmini élan qildim.

1. Rabiye xanimning töhpisi:

1). Rabiye xanim D U Q reisi bolghan deslepki 3-4 yilda xelqara kishilik hoquq munberliride paal heriket qilishi netijiside, Uyghurlar mesilisi burunqigha qarighanda dunyada keng tonulghan mesile haligha keldi. Bu yolda hetta Rabiye xanimning perzentlirining erkinlikimu qurban qilindi. Bu heqiqeten éghir bedeller idi.

2). Rabiye xanimning Amérika qatarliq bezi döletler rehberliri bilen uchrushishi we rafto mukapati, lentos mukapati qatarliq mukapatlargha érishishi hemde deslepki 2 yil nobil mukapatigha namzat körsitilishimu, Uyghurlar mesilisining xelqaralishishini ilgiri sürdi.

3). Rabiye xanim we DUQ rehberlirining ortaq térishchanliqi bilen Amérika we Yawrupa parlaméntida bezi qararlar qobul qilindi. Bu töhpe tebiiyki Rabiye xanimning namigha yézildi.

Rabiye xanim muhajirettiki Uyghur milliy herikiti musapiside yuqarqidek töhpilerni yaritish bilen birge, intayin éghir xataliqlarnimu ötküzdi.

Qisqiche töwendiki nuqtilargha yighinchaqlash mümkin:


1) Démokratiyini ayaq asti qildi.

Rabiye xanim 2006 – yili reislikni üstige alghandin bashlap, D U Q da démokratiye halak boldi. Öz béshimchiliq bilen hoquq yürgüzdi. Xalighinini qilishqa urundi. Amérika démokratiye fondidin maash élip turup, démokratiyeni depsende qildi. Konkiritni misalliri:

(1) Qurultay nizamnamisini öz xahishigha köre qanche ret özgertti yaki öz meyliche inkar qildi weyaki uning qimmitini pütünley yoqatti. Qurultay rehberlirining pikrini almidi.
(2) Pikir erkinlikini tamamen boghdi. Xataliri üchün bérilgen tenqidlerni qobul qilmidi. Tenqid bergenlerni düshmen sanap, xain atap sésitti we dewa sépidin heydep chiqardi.
(3) Qurultayda xizmet qilghan siyasiy aktiplarni xalighanda hoquqidin élip tashlidi, xalighanda östürdi, xalighanda qurultaydin heydep chiqardi we xalighanda siyasiy dewa bilen hich alaqisi bolmighan kishilerni qurultay rehberlik apparatigha öz meyliche wezipilerge teyinlidi.
(4) Her qétimliq qurultay saylamlirida saxtipezlik qildi. Özi békitken namzatlargha bilet tashlatquzush üchün wekillerge bésim ishletti. Wekillik salahiyiti bolmighan, milliy dewa bilen ezeldin munasiwiti yoq bir bölük kishilerni chiqimlirini kötürüp qurultaygha élip kélip, özi we öz terepdarliri üchün bilet tashlatquzdi. Saylam esla démokratik bolmidi. Bu ay parijda chaqirilidighan yighin üchünmu oxshash teyyarliqta bolmaqta.
(5) Yézish erkinlikini cheklidi. Uyghurche tor betlerde pikir bayan qilghan yazarlargha töhmetler artip haqaretlidi, ölüm tehditliri saldi we yazmilirini tor betlerdin mejburi öchürgüzüp turdi. Jamaet pikri hazirlap hujumlar qozghidi.
(6) Qurultay xadimlirining erkin siyasiy paaliyet élip bérish imkanlirini qoymidi. Özi qatnashmighan yighinlargha bashqilarning bérishigha ijazet bermidi. Özi körüshmigen siyasiy erbaplar yaki dölet xadimliri bilen bashqilarning körüshüshige ruxset qilmidi . Özi pilanlap achmighan yighinni bashqilarning échishigha yol qoymidi. ..


2) Pirinsipal mewqe mesiliside xatalashti

(1) Qurultay 2004 – yili maqullighan „öz teqdirini özi belgilesh“ qararini inkar qilip, birde Aptonomiye telep qilsa, birde Aliy Aptonomiye, yene birde musteqilliq (Uyghurlar aldida) telep qilip keldi. Tikishi toxtimighan bu mewqe xelqara metbuatlargha bergen bayanatliridimu orun aldi. Xelq iradisi bilen Rabiye qadir iradisi otturisida toqunush peyda boldi.
(2) D U Q rehberlirining xewirisiz, öz aldigha xitay bilen dialog qurush meqsidide xitay jasusliri bilen hemkarliship setchilikke qaldi. Emeliyette, Rabiye xanimning xitay bilen dialog qurush térishchanliqining hélimu mexpiy dawam qiliwatqanliqi melum.
(3) Rabiye xanim chetellerdiki Uyghur jamaitini izchil aldap keldi. „wetenni 2 yilda azat qilimen,“ „Sherqiy Türkistan 5 yilda azat bolidu!“ shuarliri we wedilirini Uyghur jamaitige yighilishlarda ashkare jakalap, buningdin bir qisim nadan xelqni aldashning desmisi süpitide paydilandi.
(4) Turaqsiz idiye, turaqsiz mewqesi seweblik, barliq döletlerdiki Uyghurlarni bir birige düshmen qilip, milliy ittipaqliqqa éghir ziyan saldi.
(5) Qurultay etrapidiki muxalip pikirlerdiki siyasiy aktiplar we ziyalilarni dewa sépidin uzaqlashturdi.


3) Maliye mesiliside xatalashti

(1) Rabiye xanim 2006 – yili D U Q gha reis bolghandin buyan maliye doklati bermidi.
(2) Rabiye xanim 2006 – yilidin buyan „Uyghur öyi sétiwélish“ yaki „meschit sélish“ weyaki „Amérika kongiréside qarar aldurush“dek ataqlarda Uyghur jamaitidin köp qétim köp miqdarda pul toplidi. Bezilirini özining bashqurushidiki Banka hésabigha yatquzdi. Bezilirini özi neq kötürüp ketti. Bezilirini kishiler Amérika we Gérmaniyege qeder ekélip berdi. Emma D U Qning hazirgha qeder zadi qanche pul toplighanliqi we bu pullarni nelerge serip qilghanliqi melum emes.
(3) DUQgha kélidighan yardemlerni DUQgha qarshi bolghan teshkilatlargha aqturdi.
(4) Rabiye xanim sherqiy jenubiy asiya ellirige qéchip chiqqan Uyghur muhajirlirini qutuldurush namida türkiye we bashqa ellerdin köp miqdarda pul toplighan bolsimu, toplighan pullirining hésabi yoq hemde bu heqte hazirgha qeder DUQ rehberlirige hichqandaq melumat bermidi. Qurultay maliyesi: Rabiye qadir+Séyt tumtürk = DUQ = 0


4) Teshkiliy tüzülmini berbat qildi

(1) DUQ da teshkiliy tüzüm dégen nerse qalmidi. Teshkilat nizamnamisi yoqalghangha oxshash, teshkiliy tüzümmu yoqaldi.
(2) Teshkilatta wezipe alghan shexslerning pirinsip boyiche ishlishige yol qoymidi. Kimni xalisa, shuninggha wezipe tapshurup, qurultay rehberliri arisida toqunushlar peyda qildi.
(3) DUQ terkibidiki barliq teshkilatlarni ichkiy ziddiyetlerge paturup, ularning rolini nölge aylandurdi. Hazir DUQgha eza bolghan 20 din artuq teshkilat asasiy jehettin küchidin qaldi.
(4) Yéngi teshkilatlarni qurush, kona teshkilatlarni emeldin qaldurush ishlirini DUQda muzakirilishish arqiliq emes, öz meyliche belgilep, teshkilatlar arisida, uyghur siyasiy aktipliri arisida ziddiyetler peyda qildi.
(5) Özi DUQ reisi turup, DUQgha qarshi teshkilatlar qurup chiqti we DUQ rehberlirige hujum qilghuzdi.
(6) Türkiye we Yawrupa elliride qurulghan we quruliwatqan yéngi ijtimaiy, medeniy teshkilatlarni yoqitishqa urundi we ulargha hujum qozghidi.
(7) DUQning her qétimliq qurultiyi peqetla saylam ötküzidighan yighilishqa aylinip qaldi. Milliy dewaning tereqqiyati üchün kimler nimilerni qilishni emes, belki kimlerni qaysi orungha wezipige teyinleshni talishish, jidellishish D U Qning 3 yilda bir ötküzilidighan qurultaylirining tüp wezipisige aylandi.

3. DUQ ni qaytidin qurup chiqishning zörüyiti

D U Q ning bügünge kelgende ne teshkiliy tüzümi bolmighan, ne nizamnamisining küchi bolmighan, ne pirinsipi bolmighan, ne maliyesi bolmighan, ne birliki bolmighan bir qorchaq teshkilatqa aylinip qélishi, hichbir Uyghur xalimaydighan pajie!

DUQda xizmet qilip kelgen we muhajirettiki uyghur milliy herikitige yéqindin yardemde bolup kelgen köpligen kishiler, 10 yildin buyan Rabiye xanimning xataliqlirigha süküt qilish, sebre qilish, teklip bérish, tenqit bérish, tüzitishke urunush yolida köp ejirlerni qildi. Netije itibari bilen, érishken jawaplarning hemmisi haqaret we türlik hujumlar boldi. Hemmidinmu yamini; DUQ ning halaketke yüzlinishi!

Bu, xitayningmu qolidin kelmigen idi.

„Dostni yighlitip, düshmenni küldürmeslik“ we xeqaradiki tesirimizge dexli yetküzmeslikni üchün bügün shunchilik yazay.

Rabiye xanimning tilgha alghusiz xataliqlirini pakitliri bilen téximu köp ipadileshtin elwettiki, hichkim tosup qalamaydu!

Shunimu eskertish lazim:

DUQ ning Gérmaniyediki rehberliri bu yil 29 – yanwar Rabiye xanimgha izzet – hörmiti bilen qurultay reislikidin chékinish teklipini yollighan. Teklipte Rabiye xanimni Uyghur milliy herikitining Lideri süpitide eng égizde turup bérishke tewsiye qilghan. Xataliqlarning tekrarlanmasliqi, qurultay nam – sheripining téximu zidilenmesliki, milletning ümidsizlenmesliki üchün buningdin artuq we muwapiq yolning yoqliqini bildürüshke térishqan. Emma érishken jawab ijabiy bolmighan. He dégendila tor betlerde pitniler térip, chirayliqche yollanghan teklipke zeherxendilerche jawaplar qayturghan. Elwette, bu tetür jawapqa keskin qarshi jawapmu bérilip ötken.

Aqiwette, Rabiye xanim özining yétim qalghanliqini, teng turup bolalmaydighanliqini hés qilip, muresse yolini tutqan.

Amérikadiki bir bölük Wetenperwer, wijdanliq ziyalilardin Shöhret hoshur, Nuri türkel, Alim séyitof, Ömer qanat qatarliqlar arigha kirip, ishni kélishim bilen hel qilishni wujudqa chiqarghan. Yeni, 5 – qurultayni Parijda chaqirip, D U Q ixtilabini ilmiy shekilde hel qilish.

Emma Rabiye xanim bu kélishimgimu emel qilmay, 5 – qurultayda yene reis bolush, öz ornini saqlap qélish üchün ezeldin bu dewa bilen alaqisi bolmighan chomaqchilarni özige awaz bergüzüsh üchün pütün chiqimini kötürüp qurultaygha ekilishke térishmaqta. Türkiyediki uyghur etkeschisi Séyt tomtürkmu, anglashlargha qarighanda özining uruq ewladidin 30 kishini yighingha hazirlighan. Buningliq bilen qalmay, qurultayda özining ornigha tehlike hésaplighan ademlerge tor betlerde töhmetler artish kampaniyisi bashlighan.

2016 – yili 10 - iyul parijda chaqirish pilanlanghan qurultay, bilishimizche, démokratik bir saylam bilen DUQ rehberlik apparatini qaytidin qurup chiqip, DUQ gha yéngidin bir hayatiy küch béghishlash, Uning teshkiliy tüzümlirini eslige keltürüsh, uning nizamnamisini eslige keltürüsh, uningdin uzaqliship ketken wetenperwer ziyalilarni bir mewqe, bir mepkure astigha toplashni meqsed qilidu.

Eksiche yol bilen Rabiye xanimning tor betlerde pitniler téritip, Dolqun eysa bashliq dewa ademlirini sésitishqa urunushi, uyghur jamaiti arisida özige bolghan qarshiliqlarni kücheytishke seweb bolidu. Hepte waqit qalghanda tor urushi qozghashtin hich nep alalmaydu. Rabiye xanim epsuski, yazma zakas qobul qilghuchilarning özini sétiwitishidin zadila sawaq qobul qilmidi.

Rabiye xanimdin yenimu köp yézishqa mejburlimasliqini soraymen.

Allah heq üchün semimiy bedel tölewatqan ezimetlirimizge nusret ata qilghay!



forum.uyghuramerican.org/forum/showthread.php?46181-Rabiye-xanimni-qanchilik-ch%FCshinisiz